Скачать оригинал полного текста Синодального извода Русской Правды киевского князя Ярослава Владимировича Мудрого в формате: pdf 

Скачати повний текст оригіналу Синодального ізводу Руської Правди київського князя Ярослава Володимировича Мудрого в форматі pdf

СОУДЪ ӔРОСЛАВЛЬ ВОЛОДИМИРИЦА.

Правда Роуськаӕ.

1. Ажь оубьѥть моужь моужа, то мьстити братоу брата, любо ѡ(т)цю любо с(ы)ноу, любо браточадоу, любо братню с(ы)н(о)ви; ѡже ли не боудеть кто ѥго мьстѧ, то положити за головоу 80 гр(и)в(е)нъ, аче боудеть кнѧжь моужь или тивуна кнѧжѧ; аче ли боудеть роусинъ, любо гридь, любо коупець, любо тивунъ боӕрескъ, любо мечникъ, любо изгои, любо словенинъ, то 40 гр(и)в(е)нъ положити зань.

2. [П]о Ӕрославѣ же пакъı съвъкоупивъшесѧ с(ы)н(о)ве ѥго: Исѧславъ, С{вѧ)тославъ, Всеволодъ и моужи ихъ: Къснѧчько, Перенѣгъ, Никифоръ и ѿложиша оубиѥниѥ за головоу нъ коунами сѧ въıвоупати; а ино все ӕко же Ӕрославъ соудилъ, такоже и с(ы)н(о)ве ѥго оуставиша.

Ѡ оубииствѣ.

3. Аже кто оубиѥть кнѧжѧ моужа въ разбои, а головника не ищють, то вирьвноую платити въ чьѥи же вьрви голова лежить, то 80 А) гр(и)в(е)нъ; паки людинъ, то сорокъ гривень.

4. [К]отораӕ ли вьрвь начнеть платити дикоую вироу, колико лѣт(ъ) заплатѧть тоу вироу, занеже безъ головника имъ платити; боудеть ли головникъ ихъ въ вьрви, то зане к нимъ прикладъıваѥть, того же дѣлѧ имъ помогати головникоу, любо си дикоую вироу; нъ сплатити имъ въ обчї 40 гр(и)в(е)нъ, а головничьство а то самому головникоу; а въ 40 гр(и)в(е)нъ ѥму заплатити из дроужинъı свою часть; нъ ѡже боудеть оубилъ или въ свадѣ или въ пироу ӕвлено, тъ тако ѥмоу платіти по вьрвинъıнѣ, иже сѧ прикладъıваѥтъ вирою.

Оже станеть без винъı на разбои.

5. Боудеть ли сталъ на разбои безъ всѧкоӕ свадъı, то за разбоиника людьѥ не платѧть, нъ въıдадѧть и всего съ женою и съ дѣтьми на потокъ, а на разграблениѥ.

6. Аже кто не вложитьсѧ въ дикоую виру, томоу людьѥ не помагають, нъ самъ платить.

А се покони вирьнии.

7. А се покони вирнии бъıли при Ӕрославѣ: вирьникоу взѧти 7 вѣдеръ солодоу на нед(ѣ)лю, оже ѡвьнъ, любо полоть, или 2 ногатѣ; а въ сред(оу) коуна, оже съıръ, а въ пѧтничю такоже; а коуръ по двоѥ на д(е)нь; а хлѣбовъ 7 на нед(ѣ)лю; а пшена 7 оубороковъ; а горохоу 7 оубороковъ; а соли 7 голважень: то то вирникоу съ ѡтрокомъ; а кони 4, конемъ на ротъ соути ѡвьсъ; вирни оу 8 гр(и)в(е)нъ, а 10 коунъ перекладьнаӕ, а метелникоу 12 векши, а съсаднаӕ гр(и)вна.

Ѡ вирахъ.

8. Аже боудеть вира въ 80 гр(и)в(е)нъ, то вирникоу 16 гр(и)в(е)нъ, и 10 коунъ и 12 вѣкше, а переди съсаднаяӕ гр(и)вн(а), а за головоу З гр(и)внъı.

О кнѧжи отроцѣ.

9. Аже въ кнѧжи ѡтроцѣ, или въ конюсѣ, или въ поварѣ, то 40 гр(и)в(е)нъ; а за тиоунъ за ѡгнищнъıи и за конюшии, то 80 гр(и)в(е)нъ; а въ сельскомъ тиоунѣ въ кнѧжи или в ратаинѣмь, то 12 гр(и)внѣ; а за рѧдовича 5 гр(и)в(е)н(ъ), такоже и за боӕрескъ.

О ремьствьницѣ.

10 За ремьствьника и за ремьствьницю, то 12 гр(и)вне.

11. А за смердии холопъ 5 гр(и)в(е)нъ, а за робоу 6 гр(и)в(е)нъ.

12. А за кормилца 12 гр(и)в(е)н(ъ) и за кормилицю, хотѧ си боуди холопъ или роба.

Ѡже съвержеть виру.

13. А оже съвержеть виру, тъ гр(и)вна коунъ съметнаӕ ѡтрокоу; а кто и кльпалъ, а томоу дати дроугоую гр(и)вноу, а ѿ виръı помоченаго 9 коунъ.

14. Искавше ли послоуха и не налѣзоуть, а истьца начьнеть головою клепати, то ти имъ правьдоу желѣзо; такоже и въ всѣхъ тѧжахъ и въ татбѣ, и въ поклепѣ; ѡже не боудеть лица, тъ тогда датї ѥмоу железо из нѣволѣ до полоугр(и)внъı золота; аже ли мьнѣ, то на водоу, ѡли до двою гр(и)вноу; аже мьнѣ, то ротѣ ити ѥмоу по своѣ коунъı.

Оже кто оударить мечемь.

15. Аже кто оударить мечемъ, не въıнезъ ѥго, или роукоӕтью, то 12 гр(и)вне продаже за обидоу.

16. Оже ли въıнозъ мьчь, а не оутнеть, то гр(и)вноу коунъ.

17. Аже кто кого оударить батогомь, любо чашею, любо рогомь, любо тъıлѣснию, то 12 гр(и)внѣ; не тьрпѧ ли противоу томоу оударить мечемь, то винъı ѥмоу в томь нѣтоуть.

18. Ащє ли оутнеть роукоу и ѿпадеть роука, или оусъхнеть, или нога, или ѡко, или не оутьнеть, тъ полъвиръı 20 гр(и)в(е)нъ, а томоу за вѣкъ 10 гр(и)в(е)нъ.

19. Аже пьрьстъ оутьнеть къıӕ любо, то 3 гр(и)внъı продаже, а самомоу гривна коунъ.

Оже придет(ъ) кръвавъ моуж(ь) .

20. Оже придеть кръвавъ моуже на дворъ или синь, то видока ѥмоу не искати, нъ платиті ѥму продажю 3 гривн(ъı); или не боудеть на немь знамениӕ, то привести ѥмоу видокъ, слово противоу слова, а кто боудеть началъ, томоу платити 60 коунъ; аче же и кръвавъ придеть или боудеть самъ почалъ, а въıстоупѧть послоуси, то то ѥмоу за платежь, ѡже и били.

21. Аже оударить мечемь, а не оутнеть на см(е)рть, то 3 гр(и)внъı, а самомоу гр(и)вна за раноу, оже лѣчебноѥ; потьнеть ли на см(е)рть, то вира.

22. Или пьхнеть моужь моужа любо к собѣ, любо ѿ себе, любо по лицю оударить, или жердью оударить а видока два въıведоуть, то 3 гр(и)внъı продаже; оже боудеть варѧгъ или колбѧгъ, тъ полнаӕ видока въıвести и идета на роту.

О челѧдѣхъ.

23. Аже челядинъ съкръıѥтьсѧ, а закличють и на търгоу, а за три дни не въıведоуть ѥго, а познаѥти и третии д(е)нь, тъ свои челѧдинъ поѧти, а ѡномоу платити 3 гр(и)внъı продаже.

Оже кто въсѧдеть на чюж(ь) конь.

24. А оже кто въсӕдеть на чюжь конь не прашавъ, то 3 гр(и)внъı.

25. Аче кто конь погоубіть, или ороужиѥ, или портъ, а заповѣсть на търгоу и послѣдь познаѥть въ своѥмь городѣ, своѥ ѥмоу лицемь взѧти, а за ѡбидоу платити ѥмоу 3 гр(и)внъı.

26. Аже кто познаѥть своѥ, что боудеть погоубилъ, или оукрадено оу него что или конь, или портъ, или скотина, то не рьци: „се моѥ“, нъ „поиди на сводъ, кдѣ ѥси възѧлъ“; съведитесѧ, кто боудеть виноватъ, на того татьба снидеть; тъгда онъ З) своѥ възметь, а что боудеть съ нимь погъıбло, тоже ѥмоу начнеть платити.

27. Аче боудеть коневъıи тать, а въıдати князю на потокъ; пакъı ли боудеть клѣтьнъıи тать, то 3 гр(и)внъı платити ѥмоу.

О сводѣ.

28. А оже боудеть во ѡдиномь городѣ, то иті истьцю до конца того свода; боудеть ли съводъ по землѧмъ, то ити ѥмоу до третьӕго свода, а что боудеть лице, то томоу платити третьѥмоу платити коунами за лице а съ лицемь ити до конца сводоу, а истьчю жьдати прока; а кдѣ снидеть на конечнѧго, то томоу все платити и продажю.

Ѡ татьбѣ.

29. Пакъı ли боудеть что татебно коупилъ въ търгоу или конь, или пъртъ, или скотиноу, то въıведеть свободьна моужа два или мъıтника; аже начнеть не знати оу кого коупилъ, то ити по немь тѣмъ видокомъ на търгоу на ротоу, а истьцю своѥ лице взѧти; а что с нимь погъıбло, а того ѥмоу желѣти, а ѡномоу желѣти своихъ коунъ, зане не знаѥть оу кого купивъ; познаѥт ли на долзѣ оу кого купивъ, то своѥ коунъı възметь, и семоу платити, что оу него погъıбло, а кнѧзю продажю.

Ѡ челѧдинѣ.

30. Аже кто познаѥть челѧдинъ  свои оукраденъ, а поиметь и, то ѡномоу вести и по коунамъ и до третьӕго свода; поӕти же челѧдинъ въ челѧдина мѣсто, а ѡномоу дати лице, оть идеть до конечьнѧго свода, а то ѥсть не скотъ, нелзѣ речи: „не вѣдѣ оу кого ѥсмь коупилъ“; нъ по ӕзъıкоу ити до конча; а кдѣ боудеть конечнии тать, то опѧть воротить челѧдина, а свои поиметь, и проторъ томоу же платити, а кнѧзю продаже 12 гр(и)вне въ челѧдинѣ или оукрадъше.

О сводѣ.

31. А и своѥго города въ чюжю землю свода нѣтоуть; нъ тако же въıвести ѥму послоухъı, любо мъıтника, передъ къıмь же коупивъше, то истьцю личе взѧти, а прока ѥмоу желѣти. что с нимъ погъıбло, а ѡному своихъ коунъ желѣти.

О татьбѣ.

32. А оже оубьють кого оу клѣти или оу которои татьбъı, то оубьють въ пса мѣсто; оже ли и додьржать свѣта, то вести и на кнѧжь дворъ, оже ли оубиють и, а оуже боудоуть видѣли людиѥ съвѧзана, то платити в томь 12 гр(и)вне.

33. Аже крадеть кто скотъ въ хлѣвѣ или клѣть, то же боудеть ѡдинъ, то платити ѥмоу 3 гр(и)внъı и по 30 кунъ; боудеть ли ихъ много, то всѣмъ по 3 гр(и)внъı и по 30 коунъ платити.

Ѡ татьбѣ же.

34. Аже крадеть скотъ на поли или овци, или козъı, или свиньѥ, 60 коунъ; будеть ли ихъ много, то всѣмъ по 60 кунъ.

35. Аже крадеть гоумьно или жито въ ӕмѣ, то колико ихъ боудеть крало, то всѣмъ по 3 гр(и)вни и по 30 коунъ; а оу него же погъıбло, то оже боудеть лице, то лице поиметь, а за лѣто възметь по полоугр(и)внѣ.

36. Пакъı ли лица не боудеть, а боудеть бъıлъ кнѧжь конь, то платит зань 3 гр(и)внъı, а за инѣхъ по двѣ гр(и)внѣ.

А се оуроци скотоу.

37. Оже за кобъıлоу 60 коунъ, а за волъ гривноу, а за коровоу 40 коунъ, а за третьӕкоу 30 коунъ, а за лоньщиноу полъгр(и)внъı, а за телѧ 5 коунъ, а за свинью 5 коунъ, а за поросѧ ногата, а за овьцю 5 коунъ, а за боранъ ногата, а за жеребець, ѡже не въсѣдано нань, то гр(и)вна коунъ; а за жеребѧ 6 ногатъ, а за коровиѥ молоко 6 ногатъ, то ти оуроци смьрдомъ, ѡже платѧть кнѧзю продажю.

Оже боудоуть холопи татьѥ, соуд(ъ) кнѧж(ь).

38. А оже боудоуть холопи татьѥ, любо кнѧжи, любо боӕрьстии, любо черньчи, ихъ же кнѧзь продажею не казнить, зане соуть не свободьни, то двоици платитї истьчю за ѡбидоу.

А ѡже кто скота възищеть.

39. А оже кто възищеть коунъ на дроузѣ, а ѡнъ сѧ начнеть запирати, то ѡже на нь въıведеть послоуси, то ти поидоуть на ротоу, а онъ възмѣть своѥ коунъı; занеже не далъ ѥмоу за много лѣтъ, то платити ѥмоу за ѡбидоу 3 гр(и)внъı.

40. Аже кто коупьць купцю дасть въ коупьлю коунъı или въ гостьбоу, то коупьцю передъ послоухъı коунъ не имати, послоуси ѥмоу не надобѣ, нъ ити ѥмоу самомоу ротѣ, ѡже сѧ почнеть запирати.

О поклажаи.

41. Аже кто поклажаи кладеть оу кого любо, то тоу послоуха нетоуть; нъ оже начтеть болшимъ кльпати, томоу ити ротѣ, оу кого то лѣжалъ товаръ: „а толко ѥси оу мене положилъ“, занеже ѥмоу бологодѣлъ и хоронилъ товаръ ѥго.

О рѣзѣ.

42. Аже кто коунъı даѥть въ рѣзъ, или наставъ на медъ, или жито въ просопъ, то послоухъı ѥмоу ставити, како сѧ боудеть рѧдилъ, тако ѥмоу ѥмати.

О м(ѣ)с(ѧ)цьнемь рѣзѣ.

43. А м(ѣ)с(ѧ)цьнъıи рѣзъ, оже за мало, то имати ѥмоу; заидоуть ли сѧ коунъı до того же года, то дадѧть ѥмоу З) коунъı въ треть, а м(ѣ)с(ѧ)цьнъı рѣзъ ѿгрѣноути; послоуховъ ли не боудеть, а боудеть коунъ 3 гр(и)внъı, то ити ѥмоу про своѥ коунъı ротѣ; боудеть ли боле коунъ, то рчи ѥмоу тако: „промиловалъ ѥси, оже ѥси не ставилъ послоуховъ“.

А се оустави Володимир.

44. А се оуставилъ Володимиръ Всеволодичь, по с(вѧ)тополче съзвавъ дроужиноу свою на Берестовомъ: Ратибора, тъıсѧчького Къıѥвьского и Прокопию, Бѣлогородьского тъıсѧчького, Станислава, Пьреӕславьскаго тъıсѧчького, Нажира, Мирослава, Иванка Чюдиновича, Ѡльгова моужа, и оустави люди до третьӕго рѣза, оже ѥмлеть въ рѣзъ коунъı; аже кто възмѣть два рѣза, тъ то взѧти ѥмоу исто; пакъı ли възметь три рѣзъı, то иста ѥмоу не взѧтї.

Ѡ рѣзѣ.

45. [О]же кто ѥмлеть по 10 коунъ ѿ лѣта на гр(и)вноу, то того не ѿтметати.

О закупѣ.

46. [О]же закоупъ бѣжить ѿ г(о)с(по)дъı, то ѡбѣль; идеть искатъ коунъ, а ӕвлено ходить, или къ кнѧзю, или къ соудиӕмъ бѣжить ѡбидъı дѣлѧ своѥго г(о)с(поди)на, нъ про то не роботѧть ѥго, нъ дати ѥмоу правьдоу.

О послоушьствѣ.

47. На послоушьство холопа не скадають; но оже не боудеть свободьнааго, то по ноужи ти сложити на боӕрськаго тиоуна, а на инѣхъ не складъıвати.

О бородѣ.

48. А въ малѣ тѧжѥ по ноуже сложити на закоупа. А кто поръвѣть бородоу, а въıиметь знаменьѥ, а въıлѣзоуть людьѥ, то 12 гр(и)внѣ продаже; аже безъ людии, а въ поклепе, то нѣтоу продаже.

Ѡ зоубѣ.

49. Оже въıбьють зоубъ, а кръвь оувидѧть оу него въ ртѣ, а людї въıлѣзоуть, то 12 гр(и)внѣ продаже, а за зоубъ гр(и)вна.

Ѡ бърти.

50. Аже оукрадеть кто борть, то 12 гр(и)внѣ продаже.

51. Аже боудеть росѣчена землѧ или на земли знамениѥ, имь же ловлено или сѣть, то по вьрви искати въ собѣ татѧ, любо платїти продажю.

52. Аже разнаменаѥть бърть, то 12 гр(и)внѣ.

53. Аже межю перетнеть борътьноую, или ролѣиноую розореть, или дворноую тъıномь перегородить, то 12 гр(и)внѣ продаже.

54. Оже доубъ перетнеть знаменнъıи или межьнъıи, то 12 гр(и)внѣ продаже.

А се наклади.

55. А се наклади 12 грївноу: ѡтрокоу двѣ гр(и)внѣ и 20 коунъ, а самомоу ѥхати съ ѡтрокомъ на двоу коню; соути же на ротъ ѡвьсъ, а мѧсо дати ѡвьнъ или полъть, а инемь кормомь, что има чрево възметь; пюсчю 10 коунъ; перекладнаго 5 кунъ, а за мѣхъ двѣ ногатѣ.

О женѣ́.

56. Оже кто оубьѥть женоу, то тѣмь же судомь соудити, ӕко же и моужа; ѡже будеть виноватъ, то полъ виръı, 20 гр(и)в(е)нъ.

57. А въ холопѣ и въ робѣ виръı нѣтоуть, нъ ѡже боудеть без винъı оубьѥнъ, за холопъ оурокъ заплатити, или за робоу, а кнѧзю 12 гривнѣ продаже.

О задници.

58. Аже оумреть смердъ, то задница кнѧзю; аже боудоуть дъчери оу него дома, то даӕти часть на нѣ; аже боудоуть замоужемъ, то не дати имъ части.

О задници боӕрьстѣи и о дружиннѣ(и). А се ѡ заднѣцѣ.

59. Аже въ боӕрѣхъ или въ дроужинѣ, то за кнѧзѧ задница не идеть; нъ ѡже не боудеть с(ы)н(о)въ, а дъчери възмоуть.

60. Аже кто оумираӕ роздѣлить домъ, на томь же стоӕти; паки ли без рѧдоу оумреть, тъ все дѣтемъ, а на самого часть дати д(у)ши.

61. Аже жена сѧдетъ по моужи, то оу своих(ъ) дѣтеї взѧт(и) часть; а что на ню моужь възложить, тъ томоу г(о)с(по)жа ѥсть, а заднича ѥи моужнѧ не надобѣ; боудоуть ли дѣти, то что что пьрвои женъı, тъ то възмоуть дѣтї м(а)т(е)ри своѥи, любо си на женоу възложилъ боудеть, обаче м(а)т(е)ри своѥи възмоуть.

62. Оже боудеть сестра въ дому, тъ то задница не надобѣ, нъ ѿдадѧть ю за моужь брат(ь)ӕ, како си могоуть.

А се ѡ женѣ, ѡже върчетьсѧ сѣдѣти по мужи.

63. А ѥже жена върчетьсѧ сѣдѣти по моужи, а ростерѧѥть добъıтокъ и поидеть за моужь, то платити ѥи вьсе дѣтемъ; не хотѣти ли ѥи дѣти начноуть ни на дворѣ, а ѡна начьнеть хотѣти всѧко и сѣдѣти, то творити ѥи всѧкоу волю, а дѣтемъ не дати воле, нъ что ѥи далъ моужь, съ тѣмь же ѥи сѣдѣти или, свою часть въземъши, сѣдить же.

64. А м(а)т(е)рнѧ часть дѣтемъ не надобѣ; нъ комоу м(а)ти дасть, томоу же взѧти; дасть ли всѣмъ, то все роздѣлѧть; безъ ӕзъка ли оумреть, то оу кого боудеть на дворе бъıла и кто ю кърмилъ, то томоу взѧти.

65. Аже боудоуть двою моужю дѣти, а ѡдинои м(а)т(е)ри, а ѡнемь своѥго боудеть ли потер(ѧ)лъ своѥго иночима что, а ѡнѣхъ ѡ(т)ца, а оумреть, то възворотѧть брат(ь)и, на нь  же и людьѥ въıлѣзуть, что боудеть о(те)ць. ѥго истерѧлъ иночимлѧ; что ѥмоу своѥго ѡ(т)ца, то дьржать.

66. А м(а)т(е)ри которъıи с(ы)нъ боудеть добръ, томоу же дасть своѥ; аче вси боудоуть ѥи с(ы)н(о)ви лиси, а дъчери можеть дати, кто ю кърмить.

А се оурочи судебнии.

67. А се оурочи соудебнии: ѿ виръı 9 коунъ, а мѧтелникоу 9 вѣкошь, а ѿ бортьнои земли 30 коунъ, а онѣхъ всѣхъ тѧжь, комоу помогоуть, по 4 кунъı, а метелникоу 6 вѣкошь.

Ѡ задници.

68. Аже братьӕ ростѧжються передъ кнѧземъ ѡ задницю, то которъıи дѣчькъıи дѣтии ихъ дѣлитъ, то томоу взѧти гр(и)вна коунъ.

Оурочи ротний.

69. А се оурочи ротнии: ѿ головъı 30 коунъ, а ѿ бортьнои земли 30 коунъ бес треи коунъ; такоже и ѿ ролеинои земли, и ѿ свободъı 9 кунъ.

А се ѡ коупци, ѡже истопитьс(ѧ).

70. [О]же которъıи коупьць, шедъ кдѣ любо съ чюжими коунами, и истопитьсѧ, любо рать възметь, любо ѡгнь, то не насилити ѥмоу, ни продати ѥго, нъ како почнеть ѿ лѣта платити, такоже платить, занеже пагоуба ѿ б(ог)а ѥсть, а не виноватъ ѥсть; ѡже ли пропьѥтьс(ѧ) или пробиѥтьсѥ, въ безоумии чюжь товаръ испорътить, то како любо тѣмъ, чьѥ то коунъı, жьдоуть ли ѥмоу, а своӕ имъ волѧ, или продадуть ли, своӕ имъ волѧ.

О долзѣ.

71. Аже кто многъıмъ долженъ боудеть, а пришедъ гость изъ иного города или чюжеземьць, а не вѣдаӕ запоустить зань товаръ, а ѡпѧть начнеть не дати начнеть гости коунъ ѥму, а пьрвии дължь бити начьноуть ѥмоу запинати, не дадоуче ѥмоу коунъ, то вести и на торгъ, и продати, и ѿдати же пьрвѣѥ гостинъı коунъı, а домашьнъıмъ, что сѧ ѡстанеть коунъ, тѣмь же сѧ подѣлѧть; пакъı же ли боудоуть кнѧже коунъı, то кнѧже коунъı переже взѧти, а прокъ въ дѣлъ; аже кто много реза ималъ, то томоу не имати.

О закоупѣ.

72. Оже ролѣинъıи закупъ оу г(о)с(поди)на  боудеть, а погоубить воискъıи конь, то не платїти ѥмоу; нъ ѥже далъ ѥмоу г(о)с(поди)нъ плоугъ и бороноу, ѿ него же ковоу ѥмлеть, тъ то погоубивъши, ѥмоу платити; оже ли г(о)с(поди)нъ ѿслеть ѥго на своѥ ѡроудьѥ, а погъıнеть без него, того ѥмоу не платити.

О закоупѣ.

73. Оже изъ хлѣва въıведоуть, то закоупоу того не платити; нъ ѡже погоубить на поли, и въ дворъ не въженеть и и не затворить, кдѣ ѥмоу г(о)с(поди)нъ велить, или ороудиӕ своӕ дѣӕ, а того погоубить, то то ѥмоу платити.

74. Аже г(о)с(поди)нъ переѡбидить закоупа, а оувѣдить враждоу ѥго или ѡтрицю, то то ѥмоу воротити, а за ѡбидоу ѥмоу платїти ѥмоу 7 коунъ; пакъı ли прииметь на немь коунъ, то опѧть ѥмоу воротіти коунъı, что боудеть приӕлъ, а за обидоу платити ѥмоу 3 гр(и)внѣ продаже; продасть ли г(о)с(поди)нъ закоупа ѡбьль, то наиметоу свобода въ всехъ коунахъ, а г(о)с(поди)ноу платити за ѡбидоу 12 гр(и)внѣ продаже; аже г(о)с(поди)нъ бьѥть закоупа про дѣло, то без винъı ѥсть; бьѥть ли не смъıслѧ пьӕнъ, без винъı, то ӕко же и въ свободнемь платежь, такоже и въ закоупѣ.

О холопѣ.

75. Аже холопъ ѡбѣльнъıи въıведеть конь чии любо, то платити зань 2 гр(и)внѣ.

О закоупѣ.

76. О закоупѣ оже оувѣдеть что, то г(о)с(поди)нъ въ томь; нъ ѡже г(о)с(поди)нъ индѣ налѣзоуть, то заплатить переднии г(о)с(поди)нъ ѥго конь или ино что боудеть взѧлъ, ѥмоу холопъ ѡбьльнии; пакъı ли г(о)с(поди)нъ не хотѣти начнеть платити зань г), а продасть и, ѿдаєть же переди или за конь, или за волъ, или за товаръ, что боудеть чюжего взѧлъ, а прокъ ѥмоу самомоу взѧти собѣ.

А се ѡже холопъ оударить.

77. Аже холопъ оударить свободна моужа, а оубѣжить въ хоромъ, а г(о)с(поди)нъ ѥго не видасть, то платитї зань г(о)с(поди)ноу 12 гр(и)внѣ, а затѣмъ аче кдѣ налѣзѣть оударенъıи тъ своѥго истьча, кто же ѥго оударилъ, то Ӕрославъ былъ оуставилъ и оубити; нъ с(ы)н(о)ве ѥго оуставиша по ѡ(т)ци на коунъı, любо и бити розвѧзавше, или взѧти гр(и)вна кунъ за соромъ.

А се ѡ борти.

78. Аже борть подътнеть, то 3 продаже, а за дерево полъ гр(и)внѣ.

79. Аже бчелъı въıдереть, то 3 гр(и)вне продаже, а за медъ, ѡже боудоуть бчелъı не лаженъı, то 10 кунъ; боудеть ли ѡлекъ, то 5 коунъ.

80. Не боудеть ли татѧ, то по слѣдоу женоуть; аже не боудеть слѣда: или къ селоу, или к товароу, а не ѿсочать ѿ себе слѣда, ни ѥдоуть на слѣдъ, или ѡтобиютьсѧ, тъ тѣмъ платити татбоу и продажю; а слѣдъ гнати съ чюжими людми, а с послоухъı; аже погоубѧть слѣдъ на гостинци на велицѣ, а села  не боудеть, или на поусте, кдѣ же не боудеть ни села, ни людии, то не платити ни продаже, нї татьбы.

О смѣрдѣ.

81. Оже смердъ моучить смьрда безъ кнѧжѧ слова, то 3 гр(и)вн(е) продаже, а за моуку гр(и)вна коунъ.

82. Аже ѡгнищанина моучить, то 12 гр(и)вне продаже, а за моукоу гр(и)вна.

83. Аже лодью оукрадеть, то 7 коунъ продаже, а лодию лицемь воротити; а за морьскоую лодью 3 гривнъı, а за набоиноую 2 гр(и)вне; а за челнъ 8 коунъ, а за строугъ гр(и)вна.

Ѡ перевесехъ.

84. Аже перетнеть вьрвь въ перевесѣ, то 3 гр(и)вне продаже, а за вьрвь гр(и)вна кунъ.

85. Аже кто оукрадеть въ чеѥи перевесе или соколъ, или ӕстрѧбъ, то продаже 3 гривнъı продаже, а г(о)с(поди)ноу гр(и)вна; а за голоубь 9 коунъ, а за коурѧ 9 коунъ, а за оутовь 30 коунъ, а за гоусь 30 коунъ, а за лебедь 30 коунъ, а за жеравь 30 коунъ.

86. А в сенѣ и въ дровѣхъ 9 кунъ, а г(о)с(поди)ноу, колико боудеть возъ оукрадено, то имати ѥмоу по 2 ногатѣ за возъ.

Ѡ гоумнѣ.

87. Аже зажьжеть гоумно, то на потокъ и на розграбежь домъ ѥго, переди пагоубоу исплатить, а въ прочи кнѧзю поточити и; тако же ѡже кто дворъ зажьжеть.

88. А кто пакощами порежеть конь или скотиноу, то продаже 12 гр(и)вне, а за пагоубоу гр(и)вноу оурокъ платити.

89. [Т]ъı тѧже все соудѧть послоухъı свободьнъıми; боудеть ли послоухъ холопъ, то холопоу на правдоу не въıлазїти; нъ ѡже хочеть истьчь или иметь и, а река тако: „по сего речи ѥмлю тѧ, нъ азъ ѥмлю тѧ, а не холопъ“, и ѥмете и на желѣзо; аже ѡбинить и, то ѥмьлеть на немъ своѥ, не обинить ли ѥго, а платити ѥмоу гривноу за моукоу, за по холопьи речи ӕлъ и.

90. А желѣзнаго платити 40 коунъ, а мечникоу 5 коунъ, а полъ гр(и)вне дѣтьчьскомоу, то ти желѣзнъıи оурокъ, кто си въ чемь ѥмлеть; оже иметь на желѣзо по свободьнъıхъ людии речи, любо запа на нь боудеть, любо прохожениѥ ночноѥ, или къıмь любо ѡбразомь аже не ѡжьжетьсѧ, то про моукъı не платити ѥмоу; нъ ѡдино желѣзноѥ, кто будеть ӕлъ.

А се за закладаюче городъ.

91. А се оурочи городникоу: закладаюче городьнѧ, куна  взѧти, а кончавше ногата; а за кормъ, и за вологу, и за мѧся, и за ръıбъı 7 коунъ на недѣлю, 7 хлѣбовъ, 7 оубороковъ пшена, 7 лоуконъ ѡвса на 4 кони, имати же ѥмоу донелѣ городъ съроубѧть, а солодоу дадѧть ѥмоу ѡдиноу 10 лоуконъ.

А се оуроци мостьникоу.

92. А се мостьникоу оуроци: помостивъше мостъ, взѧти ѿ 10 локотъ по ногатѣ; аже починить моста ветхаго, то колико городень починить, то взѧти ѥмоу по кунѣ ѿ городне, а мостьникоу ѥхати самомоу съ ѡтрокомъ на двоу коню, взѧти 4 лоукна ѡвса на недѣлю, а ѣсти что можета.

О задници. Ѡ холопъихъ дѣтеи.

93. Аже боудоуть робьѥ дѣти оу моужа, то задницѣ имъ не имати, нъ свобода имъ съ м(а)т(е)рью.

94. Аже боудоуть въ домоу дѣти малъı, а не джи сѧ боудоуть сами собою печаловати, а м(а)ти имъ поидеть за моужь, то токмо имъ ближеи боудоуть, томоу же дати на роуцѣ и съ добъıтъкомь и съ домомь, донелѣже възмогоуть; а товаръ датї передъ людьми; а что сърѣзить товаромь тѣмь ли пригостить, то то ѥмоу собѣ, а истъıи товаръ воротить имъ, а прикоупъ ѥмоу собѣ, зане кърмилъ и печаловалъсѧ; аже ѿ челѧди плъдъ или ѿ скота, то то поймати лицемь; что поималъ боудеть, или истерѧлъ, то то ѥмоу все платити дѣтѣмъ тѣмъ.

95. Аче же и ѡтьцимъ прииметь дѣти съ задьницею, то такоже ѥсть рѧдъ.

96. А дворъ безъ дѣла ѡтьнь всѧко мьншемоу с(ъı)н(о)ви.

Ѡ холопьствѣ.

97. Холопьство ѡбьлноѥ троѥ: ѡже коупить хотѧ и до полоугр(и)вьнъı, а послоухъı поставѧть, а ногатоу дасть передъ самѣмь холопомь; а второѥ холопьство: поиметь робоу безъ рѧдоу; поиметь ли сѧ съ рѧдомъ, то како боудеть сѧ рѧдилъ на томь же стоить; а се третьѥѥ холопьство: тиоуньство без рѧдоу или привѧжеть к собѣ ключь без дрѧдоу, или с рѧдомъ, то како сѧ боудеть рѧдилъ, на томь же стоить.

98. [В] даче не холопъ, ни по хлѣбе роботѧть, ни по придатъцѣ, нъ ѡже не доходѧть года, то ворочати ѥмоу м(и)л(о)сть; ѿходить ли, то не виноватъ ѥсть.

99. Аже холопъ бѣжить, а заповѣсть г(о)с(поди)нъ, оже слъıшавъ кто, или знаӕ и вѣдаӕ, оже ѥсть холопъ, и дасть ѥмоу хлѣба, или оукажеть ѥмоу поуть, то платити ѥмоу за холопъ 5 гр(и)в(е)нъ, а за робоу 6 гр(и)в(е)нъ.

100. Аже кто переиметь чюжь холопъ и дасть вѣсть г(о)с(поди)ноу ѥго, то имати ѥму переѥмъ гр(и)вна коунъ; не оублюдеть ли, то платити ѥмоу 4 гр(и)внъı, а пѧтаѧ ѥмоу переима; оже боудеть роба, тъ 5 гр(и)в(е)нъ, а шестаӕ на переѥмъ ѿходить.

101. Аже кто своѥго холопа самъ досочитьсѧ въ чиѥмь любо родѣ, а боудетъ посадникъ не вѣдалъ ѥго, то, повѣдавше ѥмоу, поӕти оу него ѡтрокъ и шедъши оувѧзати и, и дати ѥмоу вѧзебное 10 коунъ, а переима нѣтоуть; аче оупоустить, собѣ ѥмоу пагоуба, а не платить в то нїкто же тѣмь же и переима нѣтоуть.

102. Аже кто не вѣдаӕ чюжь холопъ оусрѧчеть, или вѣсти дѣѥтъ, любо дьржить оу себе, идеть ѿ него, то ити ѥмоу ротѣ, ӕко не вѣдалъ ѥсмь, ѡже ѥсть холопъ, а платежа в томь нѣтоуть.

103. Аче же холопъ кдѣ коунъı вложить, а ѡнъ не вѣдаӕ вдалъ, то г(о)с(поди)ноу въıкоупати али лишитисѧ ѥго; вѣдаӕ ли боудеть далъ, то коунъ ѥмоу лишитисѧ.

104. Аже кто поустить холопа въ торгъ, а ѡдолжаѥть, то въıкоупати ѥго г(о)с(поди)ну, а не лишитьсѧ ѥго.

105. Аже кто крьнеть чюжь холопъ, не вѣдаӕ, то пьрвомоу г(о)с(поди)ноу холопъ поӕти, а ѡномоу коунъı имати ротѣ ходивше, ӕко не вѣдаӕ ѥсмь коупилъ.

106. ...г(о)с(поди)ну же и товаръ, а не лишатисѧ ѥго.

107. Аже кто бѣжа, а поѥмлеть что соусѣдне или товаръ, то г(о)с(поди)ноу платити зань оурокъ, что боудеть взѧлъ.

108. Аже холопъ крадеть кого любо, то г(о)с(поди)ноу въıкоупати и любо въıдати и съ къıмъ боудеть кралъ, а женѣ и дѣтемъ не надобѣ; а ѡже боудоуть с нимь крали и хоронили, то всехъ въıдати; пакъı ли, а въıкоупаѥть г(о)с(поди)нъ; аже боудоуть свободнии с нимь крали или хоронили, то кнѧзю въ продаже.

Нравится? Лайкни!