Главная » Статьи » Исторические документы / Історичні документи

Руська правда (Троіцький ізвод) / Русская правда (Троицкий извод)


Скачать оригинал полного текста Троицкого извода Русской Правды киевского князя Ярослава Владимировича Мудрого в формате: pdf 

Скачати оригінал повного тексту Троіцького ізводу Руської Правди києвського князя Ярослава Володимировича Мудрого в форматі  pdf

 

СУД(Ъ)  ӔРОСЛАВЛЬ ВОЛ(О)ДИМѢРИЧ(А)

Правда Руськаӕ.

1 [1, 1] Аже  оубиѥть) мужь  мужа, то мьстити  брату  брата, любо (ѡ)тцю, ли с(ъı)ну, любо брату  чадо, ли  братню с(ъı)н(о)ви; [2] аще ли не  будеть  кто ѥго мьстѧ, то  положити) за голову  80 гри(венъ), аче  будеть  кнѧжь моужь  или тиоуна  кнѧжа; [3] аще ли  будеть  русинъ, или  гридь, любо купець, любо  тивунъ  боӕрескъ, любо мечникъ, любо ізгѡи, ли  словѣнинъ, то 40   гри(венъ) положити  зань.

2 [2, 4] По Ӕрославѣ  же паки совкупившесѧ с(ъı)н(о)ве ѥгѡ: изѧславъ, С(вѧ)тославъ, Всеволодъ и  мужи  ихъ: Коснѧчько, Перенѣгъ. Никифоръ  і ѿложиша оубиѥниѥ  за голову, но кунами сѧ  въıкупати, а іно  все, ӕкоже Ӕрославъ  судилъ, такоже і  с(ъı)н(о)ве ѥго  оуставиша.

 

[5] Ѻ  оубииствѣ.

 

3 [3, 3] Аже  кто оубиѥть  кнѧжа мужа в разбѡи, а головника  не ищють, то виревную  платити  въ  чьѥи  же  верви голова лежить, то 80 гри(венъ); паки л(и) людинъ,  то  40 гри(венъ).

4 [4, 6] Котѡраӕ  ли  вервь начнеть платити  дикую  вѣру, кѡлико лѣть заплатить ту виру, занеже  без головника  имъ  платяти; [7] будеть  ли головникъ  ихъ въ верви, то  зань  к ним приприкладъıваѥть, тогѡ же  дѣлѧ  имъ помагати  головникоу любо си дикую  вѣру;[8]но сплати  імъ  вообчи 40 гри(венъ), аголовничьство самому головнику;а въ40  гри(венъ)ѥму заплатити ис  дружинъı  свою  часть; [9] но  оже  будетъ  оубилъ или  въ свадѣ, или  в пиру  ӕвлено, то тако ѥму платити  по вервинъıнѣ, іже сѧ прикладъıвають  вирою.

 

[10] Ѻже  станеть  без вин(ъı)  на разбои.

 

5 [5 ] Будеть ли сталъ на разбои безъ  всѧкоӕ  свадъı то за  разбѡіника люди  не платѧть, но въıдадѧть  и  всего съ женою і с  дѣтми на потѡкъ  и  на разграблениѥ.

6 [6, 11] Аже  кто не вложиться(ѧ)  в дикую  вѣру, тому  люд(і)ѥ  не помагають, но самъ платить.

7 [7, 12] А  се покони вирнии  бъıли при  Ӕрославѣ: вирнику  взѧти 7  вѣдеръ солоду на недѣлю же овенъ, любо полоть, любо 2  ногатѣ, а в середу куна же съıръ, а  в  пятницю такоже; а куръ пѡ двою ѥму на д(е)нь; а хлѣбѡвъ 7 на недѣлю; а  пшена 7  оуборкѡвъ, а гороху  7  оуборковъ; а  соли 7  голважень; то то вирнику  со отрокомь; а кони 4, конемъ  на ротъ сути  овесъ; вирнику  8 гри(венъ), а 10 кунъ  перекладнаӕ, а метелнику 12 вѣкшии, а  съсадная гривна.

8 [8] Аже  будеть  вира  во  80 гри(венъ), то вирнику  16 гри(венъ)  и  10 кунъ и  12  вѣкши, а переди  съсаднаӕ  гри(вна), а  за голову 3  грив(нъı).

 

(13) Ѻ  кнѧжи  мужѣ.

 

9 [9] Аже  въ  кнѧжи  отроци, іли  в конюсѣ, іли  в поварѣ, то  40 гри(венъ); (13) а за тивунъ  за ѡгнищнъıи  і  за конюшии, то  80  гри(венъ); (14) а в сельскѡмь  тивунѣ  кнѧжѣ  іли  в ратаинѣмь, то  12 гриве(нъ), а  за рѧдовича  5  гри(венъ); (14) такоже  и  за боӕрескъ.

 

(15) Ѻ ремественицѣ и Ѻ ремественицѣ.

 

10 [12] А  за ремественика и за ремественицю, то  12 гри(венъ).

11 [13, 16] А  за смердии  холѡпъ 5 гри(венъ), а  за  робу  6 гри(венъ).

12 [14, 17] А за кормилцѧ  12, такоже и  за  кормилицю, хотѧ си  буди холѡпъ, хотѧ  си  роба.

(18) Ѻ поклепнѣи вирѣ.

13 [15] Аще  будеть  на когѡ поклепнаӕ  вира, то же  будеть послуховъ  7, то ти  въıведуть  виру; (19) паки  ли  варѧгъ  или кто інъ  тогда.

14 [20] А  по костехъ и  по м(е)ртвеци  не платить  верви, аже имене не вѣдають, ни  знають  ѥго.

(21) Аже  свержеть  ввроу.

15 [16] А иже свержеть  виру, то грив(на)  кунъ  сметнаӕ  отроку , а кто и клепалъ, а  тому  дати другую  гривну; а ѿ  виръı  помечнаго 9.

16 [17, 22] Искавше  ли послуха  не налѣзуть, а істьцѧ  начнеть  головою  клепати, тогда дати імъ правду  желѣзо; (23) такоже  и во всѣхъ тѧжахъ, в татбѣ  и  в поклепѣ, оже не  будеть  лицѧ, то тогда  дати ѥму желѣзо из невѡли  до  полугри(внъı) золота; аже  ли  мнѣ  то на воду; оли  то  до  дву грив(енъ), аже  мене, то  ротѣ ѥму  ити по своѣ кунъı.

17 [18, 25] Аже  кто оударить  мечемь, не въıнезъ ѥго, или рукоӕтию, то 12 гри(венъ)  продажи  за обиду.

18 [19, 2б] Аже ли въıнезъ  мечь, а не оутнеть, то гри(вна) кунъ.

19 [20, 27] Аже кто  когѡ  оударить батогомь, любо чашею, любо рогомь, любо тъıлѣснию, то 12 гри(венъ); (28) не терпѧ ли противу тому, оударить мечемь, то винъı ѥму в тѡмь нѣтуть.

20 [21, 29] Аче  ли  оутнеть  руку  і ѿпадеть рука  іли оусхнеть, іли іли  нога,  іли око, іли не оутнеть, то полувирьѥ — 20 гри(венъ), а  тому  за вѣкъ 10 гри(венъ).

21 [22, 30] Аже  перстъ  оутнеть  кии любо 3  грив(нъı) продажѣ, а самомоу гривна  коунъ.

(31) А  придеть кровавъ моужь.

22 [23] Аже  придеть  кровавъ  мужь на двѡръ или  синь, то видока ѥму  не іскати,но платити  ѥму продажю 3  гри(внъı); (32) аще  ли  не будеть на немь знамениӕ, то  привести ѥму  видѡкъ, слово  противу  слова; а  кто будеть почалъ  тому  плати  60 кунъ; (33) аче же и  кровавъ  придеть  іли будеть  самъ почалъ, а въıлѣзуть  послуси, то то ѥму за платежь, оже и били.'

23 [24, 34] Аже оударить мечемь, а не оутнеть  на смерть, то 3 гри(внъı), а  самому гри(вна), за рану  же  лѣчебное; (35) пѡтнеть ли на см(е)рть, а  вира.

24 [25, 36] Аче пѡпъхнеть  мужь мужа любо  к собѣ ли  ѿ собе, любо по лицю оударить, ли  жердью оударить, а видока два въıведуть то 3 гри(внъı) продажи; (37) аже  будеть  варѧгъ іли колбѧгъ, то полнаӕ видока въıвести  і идета на ротоу.

 

(38) Ѻ челѧди.

 

25 [26] А челѧдинъ скръıѥтьс(ѧ), а закличють и на торгу, а за 3 дни(и) не въıведуть ѥго, а пѡзнаѥть и третии д(е)нь, то свои челѧдинъ понѧти, а оному платити 3 гри(внъı) продажи.

(39) Аже кто всѧдеть на чюж(ь) кон(ь).

26 [27] Аже кто всѧдеть на чюжь кѡнь, не прашавъ, то 3 гри(внъı).

27 [28, 40] Аче кто кѡнь погубить, или оружьѥ, іли портъ, а заповѣсть на торгу, а пѡслѣ пѡзнаѥть въ своѥмъ городѣ, своѥ ѥму лицемь взѧти, а за обиду платити ѥму 3 гри(внъı).

28 [29, 41] Аже кто пѡзнаѥть своѥ, что будеть погубилъ, іли оукраденѡ оу негѡ что, и или кѡнь, или  портъ, іли скотина, то не рци  и: „се моѥ“, но: пѡіди на свѡдъ, кдѣ ѥсть взѧлъ, сведитесѧ, кто будеть  виноватъ, на тогѡ  татба  снидеть тогда ѡнъ своѥ возметь, а что погибло боудеть  с нимь, тоже ѥму начнеть платити.

29 [42] Аще  будеть коневъıи тать, въıдати  кнѧзю на потѡкъ; (30, 43) паки  ли боудеть клѣтнъıи тать, то 3 грив(нъı) платити ѥмоу.

 

(44) Ѻ свѡдѣ.

 

30 [31] Аже 2  будеть  во ѻдиномь  городѣ, то ити  истьцю до кѡнцѧ тогѡ свѡда; будеть ли свѡдъ по землѧмъ, то ити ѥму до третьӕгѡ свѡда; а что будеть лице, то тому платити третьѥму кунами  за лице; а  с лицемь ити до кѡнцѧ своду, а  істьцю ждати прока; а кдѣ снидеть на конечнѧгѡ, то тому все платити и продажю.

 

(45) Ѻ  татбѣ.

 

31 [32] Паки ли  будеть что татебно купилъ в торгу, или кѡнь, или портъ, іли скотину, то въıведеть свободна мужа два или мъıтника; аже начнеть не знати оу когѡ купилъ, то іти по немь тѣм видокомъ на роту, а истьцю своѥ лице взѧти; а что с нимь погибло, а тогѡ ѥму желѣти, а ѻному желѣти своихъ кунъ, зане не знаѥть оу когѡ купивъ; (46) познаѥть ли на долзѣ оу когѡ то купилъ, то своѣ кунъı возметь і, сему платити, что оу негѡ будеть погибло, а кнѧзю продажю.

(47) Аже пѡзнаѥть кто челѧдь.

 

32 [33] Аще пѡзнаѥть кто челѧдинъ свѡи оукраденъ, а пѡиметь и  то ѻному вести и по кунамъ до 3-го свода; поӕти же челѧдина в челѧдинъ мѣсто, а ѻному дати лице, ать ідеть до конечнѧго свода; а то ѥсть не скѡтъ, нѣлзѣ рчи оу когѡ ѥсмь купилъ, но по ӕзъıку ити до кѡнцѧ; а кдѣ будеть конечнии тать, то ѻпѧть ворѡтѧть челѧдина; а свѡи пѡіметь И протѡръ тому же платити; (34) а кнѧзю продажѣ 12 гри(венъ) в челѧдинѣ или оукрадше.

 

(48) Ѻ свѡдѣ же.

 

33 [35] А и своѥгѡ города в чюжю землю свѡда нѣтуть; но такоже въıвести ѥму послухи любо мъıтника передъ кимь же купивше, то истьцю лице взѧти, а прѡка ѥму желѣти, что с нимь погибло, а ѻному своихъ кунъ желѣти.

 

(49) Ѻ татьб(ѣ).

 

34 [36] Аже оубиють когѻ оу клѣти іли оу котороѣ татбъı, то оубиють во пса мѣсто; (50) аже ли і додержать свѣта, то вести, на кнѧжь двѡръ; (51) ѻже ли оубиють и а оуже боуд(е)ть людиѥ, свѧзана  видѣли, то платити в тѡмъ 12 гри(венъ).

35 [37, 52] Аже крадеть кто скотъ въ хлѣвѣ или клѣть, тоже будеть ѻдинъ, то платити ѥму 3 гри(внъı) и 30 кунъ будеть ли ихъ мнѡго, — всѣмъ по 3 гри(внъı) і по 30 кунъ платіт.

 

(53) Ѻ татбѣ иже кто скота взищеть.

 

36 [38] Аже крадеть скѡтъ на поли, іли ѡвцѣ, или козъı ли свиньи, — 60 кунъ; будеть ли іхъ мнѡго, то всѣмъ по 60 кунъ.

37 [39, 54] Аже крадеть гумно іли жито въ ӕмѣ, то кѡлико ихъ будеть крало, то всѣмъ по 3 гри(внъı) і по 30 кунъ, (55) а оу него же поги[бл]о, то оже будеть  лице, лице пѡіметь, а з[а] лѣто возметь по  полугривнѣ.

38 [40] Паки ли  лицѧ не будеть, а будеть бъıлъ кнѧжь  кѡнь, то  платити зань 3 гри(внъı), а за инѣхъ по 2 гривн(ъı).

 

(56) А се оуроци скоту.

 

39 [41] Аже за кобъıлу 7  кунъ, а  за вѡлъ гри(вна), а за корѡву 40 кунъ, а за третьӕку 30 кунъ, за лѡньщину пѡлгри(внъı), за телѧ 5 кунъ, а за свинью 5 кунъ, а  за поросѧ ногата за ѡвцю 5 кунъ, за  боранъ ногата, а за жеребець, аже не всѣданѡ нань, гри(вна) кунъ, за жеребѧ  6  ног(атъ); а  за корѡвиѥ молокѡ 6 ног(атъ). То ти  оурѡци смердомъ, ѻже платѧть кнѧзю продажю.

(57) Аже буд(у)ть холѡпи татьѥ судъ кнѧжь.

40 [42] Аже буд(у)ть холѡпи татиѥ, любо кнѧжи, любо боӕрьстии, любо чернечь, іх  же кнѧзь  продажею не казнить, за не  суть несвободни, то двѡиче платить ко істьцю за ѻбидоу.

(58) Ѻже кто кунъ взищеть.

41 [43] Аже кто взищеть кунъ на друзѣ, а ѡнъ сѧ начнеть запирати, то ѻже нань въıведеть послуси, то ти  пѡідуть на роту, а ѡнъ возметь своѣ кунъı (59) занеже не далъ ѥму кунъ за мнѡго лѣтъ, то платити ѥму за ѻбиду 3 гри(внъı).

42 [44, 60] Аже кто купець  купцю дасть куплю в кунъı или гѡстьбу, то купцю пред(ъ) послухи кунъ не имати, послуси ѥму е надобѣ, но іти ѥму самому ротѣ, аже сѧ почнеть запирати.

 

(61) Ѻ поклажаи.

 

43 [45] Аже кто поклажаи кладеть оу кого любо, то ту послуха, нѣсть; [но ѡже] начнеть бѡлшимь клепати, т[ому] ити ротѣ, оу когѡ то лежалъ товаръ; „а [толко] ѥси оу мене положилъ“, занеже ѥму  въ  бологодѣль и хоронилъ товаръ тогѡ.

 

(62) Ѻ рѣзѣ.

 

44 [46] Аже кто даѥть кунъı в рѣзъ, или наставъ, в медъ, или жито во прісѡпъ, то послухи ѥму, ставити; како  сѧ будеть рѧдилъ, такоже ѥму имати.

 

(63) Ѻ мѣсѧчнѣмь рѣзѣ.

 

45 [47] Ѻ  мѣсѧчнъıи рѣзъ, ѻже за мало, то імати ѥму; заидуть ли сѧ кунъı до тогѡ же года, то дадѧть ѥму

кунъı  въ треть, а мѣсѧчнъıи рѣзъ погренути; (64) послухѡвъ  ли не будеть а будеть кунъ 3 гри(внъı), то ити ѥму про своѣ кунъı ротѣ; будеть ли боле кунъ, то речи ѥму тако: „промиловалсѧ ѥси ѻже ѥси не ставіл(ъ) послуховъ.

 

(65) ОУСТАВЪ ВОЛ(О)ДИМѢР(Ь) ВСЕВОЛ(О)ДИЧА.

 

46 [48] Володимѣръ Всеволѡдичь по С(вѧ)тополцѣ созва дружину свою на Берестовѣмь: Ратибора Киѥвьскѡ тъıсѧчьсѡго, Прокѡпью Бѣлогородьскѡгѡ тъıсѧчькѡго, Станислава Переӕславьскогѡ тъıсѧчьскогѡ, Нажира, Мирослава, Іванка Чюдиновича, Ѻлгѡва мужа и оуставили до третьӕгѡ рѣза, ѻже ѥмлеть въ треть кунъı; аже кто возметь два рѣза, то то ѥму взѧти исто; паки ли возметь три рѣзъı, то иста ѥму не взѧти.

47 [49] Аже кто ѥмлеть на 10 кунъ ѿ лѣта на гривну, то тогѡ не ѿмѣтати.

 

(66) Аже котѡръıи купець истопитьсѧ.

 

48 [50] Аже котѡръıи купець, кдѣ любо шедъ съ чюжими кунами, истопитьсѧ, любо рать возметь, ли ѡгнь, то не насилити ѥму, ни продати ѥгѡ; но како начнеть ѿ лѣта платити, тако же платить, занеже  пагуба ѿ б(ог)а ѥсть, а не виноватъ ѥсть; (67) аже ли пропиѥтьс(ѧ), или пробиѥть а в безумьи чюжь товаръ испортить, то како любо тѣмъ, чии  то товаръ, ждуть ли ѥму, а своӕ імъ волѧ, продадѧть ли, а своӕ имъ волѧ.

 

(68) Ѻ долзѣ.

 

49 [51] Аже кто мнѡгимъ долженъ будеть, а пришедъ госпѡдь изъ иногѡ города или чюжеземецъ, а не вѣдаӕ запустить зань товаръ, а ѻпѧть начнеть не дати гости кунъ а первин долже бити начнуть ѥму запинати, не дадуче ѥму кунъ, то вести и на торгъ, продати же и ѿдати же первоѥ  гостинъı коунъı, а домашнимъ, что сѧ ѻстанеть кунъ, тѣм же сѧ подѣлѧть; (69) паки ли будуть кнѧжи кунъı, то кнѧжи, кунъı первоѥ взѧти, а прѡкъ в дѣлъ; (70) аже кто мнѡго рѣза ималъ, не імати тому.

 

(71) Аже закупъ бѣжить.

 

50 [52] Аже закупъ бѣжить ѿ господъı, то ѻбель; (72) идеть ли искатъ кунъ, а ӕвленѡ хѡдить, іли ко кнѧзю, или къ судиӕмъ бѣжить ѻбидъı дѣлѧ своѥгѡ г(о)с(поди)на, то про то не рѡбѧть ѥгѡ, но дати ѥмоу правдоу.

 

(73) Ѻ закупѣ же.

 

51 [53] Аже оу  г(о)с(поди)на ролеинъıи закупъ, а погубить вѡискии кѡнь, то не платити ѥму; (74) но ѥже далъ ѥму г(о)с(поди)нъ плугъ и борону, ѿ негѡ же купу ѥмлеть, то то погубивше платити; (75) аже ли г(о)с(поди)нъ ѥго ѿслеть на своѥ ѻрудьѥ, а погибнеть без негѡ, то тогѡ ѥму не платити.

 

(76) Ѻ закупѣ ж.

 

52 [54] Аже изъ хлѣва въıведуть, то закупу того не платити (77) но же погубить на поли, и въ дворъ не вженеть і не затворить, кдѣ ѥму г(о)с(поди)нъ велить, или ѻрудьӕ своӕ дѣӕ, а тогѡ погубить, то то ѥмоу платити.

53 [55, 78] Аже г(о)с(поди)нъ переѻбидить закоупа, а оувидить купу ѥгѡ іли ѻтарицю, то то ѥму все воротити, а за ѻбиду платити ѥму 60 кунъ; (79) паки ли прииметь на немь кунъ, то ѻпѧть ѥму воротити кунъı, что будеть принѧлъ, а за ѻбиду платити ѥму 3 гри(внъı) продажи; (80) продасть ли г(о)с(поди)нъ закупа обель, то наимиту свобода во всѣхъ кунахъ, а г(о)с(подин)у за ѻбиду платити 12 гри(венъ) продажѣ; (81) аже г(о)с(поди)нъ бьѥть закупа про дѣло, то без винъı ѥсть; (82) биѥть ли не смъıслѧ, пьӕнъ, а без винъı, то ѧкоже въ свободнѣмь платежь, такоже и в закупѣ.

 

(83) Ѻ хол(опѣ).

 

54 [56] Аже холопъ ѻбелнъıи въıведеть кѡнь чии любо, то платити зань 2 гри(внъı).

 

(84) Ѻ закуп(ѣ).

 

55 [57] Аже закупъ въıведеть что, то г(о)с(поди)нъ в немь; (85) но ѻже кдѣ и налѣзуть, то преди  заплатить г(о)с(поди)нъ ѥго кѡнь или что будеть ино взѧлъ, ѥму холопъ ѻбелнъıи, (86) и паки ли г(о)с(поди)нъ не хотѣти начнеть платити зань, а продасть и, ѿдасть же переди или за кѡнь, или за волъ, или за товаръ, что будеть чюжего взѧлъ, а прокъ ѥму самому взѧти собѣ.

 

(87) А се аже холѡпъ оударить.

 

56 [58] А се аже холопъ оударить свободна мужа, а оубѣжить в хорѡмъ, а г(о)с(поди)нъ ѥго не въıдасть, то платити заньг(о)с(под)ну 12 гри(венъ), (88) а за тѣмь аче и кдѣ налѣзеть оударенъıи тъ своѥго истьцѧ, кто ѥго оударилъ, то Ӕрославъ бъıлъ оуставилъ оубити и, но с(ъı)н(о)ве ѥго по ѡтци оуставиша на кунъı, любо бити и розвѧзавше, любо ли взѧти гри(вна) кунъ за соромъ.

 

(89) Ѻ послушьствѣ.

 

57 [59] А послушьства на холопа не складають, но ѻже не будеть свободнаго, но по нужи сложити на боӕрьска тивуна, а на инѣхъ не складивати. (90) А в малѣ  тѧжѣ, по нужи, възложити на закупа.

 

(91) Ѻ бор(о)д(ѣ).

 

58 [60] А кто порветь бородоу а въньметь знамениѥ, а въıлѣзуть людиѥ, то 12 гри(венъ) продажѣ, (92) аже безъ людии, а в поклепѣ, то нѣту продажѣ.

 

(93) Ѻ зубѣ.

 

59 [61] Аже въıбьють зубъ, а кровь видѧть оу негѡ во ртѣ, а людьѥ въıлѣзуть, то 12 гри(венъ) продажѣ, а за зубъ гри(вна).

60 [62, 94] Аже оукрадеть кто бѡбръ, то 12 гри(венъ).

61 [63, 95] Аже будеть росѣчена землѧ іли знамениѥ, им же ловлено, или сѣть, то по верви  искати татѧ, ли платити  продажю.

(96) Аже кто борть разнаменаѥт(ь).

62 [64] Аже разнаменаѥть борть, то 12 гри(венъ).

63 [65, 97] Аже межю перетнеть бортьную, іли ролеіную разореть іли двѡрную тъıномь перегородить межю, то 12 гри(венъ) продажи.

64 [66, 98] Аже дубъ подотнетьзнаменьнъıи  или межьнъıи, то 12 гри(венъ) продажѣ.

 

(99) А се наклади.

 

65 [67] А се наклади 12 гри(венъ): отроку 2 гри(внъı) и  90 кунъ, а самому ѣхати со отрокомь на дву коню; сути же на ротъ ѻвесъ, а мѧсо  дати овенъ, любо полоть, а инѣмь кормомь, что има черево возметь, писцю 10 кунъ; перекладнагѡ 5 кунъ, на мѣхъ двѣ ногатѣ.

 

(100) А  се ѻ борти.

 

66 [68] Аже борть пѡдътнеть, то 3 гри(внъı) продажѣ, а за дерево полгри(внъı).

67 [69, 101] Аже пчелъı въıдереть, то  3 гри(внъı) продажи, а за медъ аже будеть пчелъı  не лаженъı, то 10 кунъ; будеть ли ѻлѣкъ то 5 кунъ.

68 [70, 102] Не будеть ли татѧ, то по слѣду женуть; аже  не боудеть слѣда ли к селу, или к товару, а не ѿсѡчать ѿ собе слѣда, ни ѣдуть на слѣдъ, или ѿбьютьс(ѧ), то тѣмь платити татбу и продажю, а слѣдъ гнати с чюжими людми, а с послухи; аже погубѧть слѣдъ на гостиньцѣ на велицѣ, а села не будеть, или на пустѣ, кдѣ же не будеть ни села, ни людии, то не платити ни продажи, ни татбъı.

 

(103) О смердѣ.

 

69 [71] Аже смердъ мучить смерда безъ кнѧжа  слова, то 3  гри(внъı) продажи, а за муку гри(вна) кунъ.

70 [72] Аже ѡгнищанина мучить, то 12 гри(венъ) продажѣ, а за муку гри(вна).

71 [73, 104] Аже лѡдью оукрадеть, то 60 кунъ продажѣ, а лѡдию лицемь воротити, а морьскую лѡдью 3 гри(внъı), а за набѡиную лѡдью 2 гри(внъı), за челнъ 20 кунъ, а за стругъ гривна.

 

(105) Ѻ перевѣсѣхъ.

 

72 [74] Аже кто пѡдотнеть вервь в перевѣсѣ, то 3 гри(внъı) продажи а г(о)с(поди)ну за вервь гри(вна) кунъ.

73 [75, 106] Аже кто оукрадеть въ чьѥмь перевѣсѣ ӕстрѧбъ или сокѡлъ, то продажѣ 3 гри(внъı), а г(о)с(поди)ну  гри(вна); (76) а за голубь 9 кунъ, а за курѧ 9 кунъ, а эа оутовь 30 кунъ, (77) а за гусь 30 кунъ, а за лебедь 30 кунъ, а за жеравль 30 кунъ.

74 [78, 107] А в сѣнѣ и въ  дровѣхъ 9 кунъ, а г(о)с(поди)ну  кѡлико боудеть вѡзъ оукрадено, то имати ѥму за вѡзъ по 2  ногатѣ.

 

(108) Ѻ гумнѣ.

 

75 [79] Аже зажгуть гумно, то на потѡкъ на грабежь дѡмъ ѥгѡ, переди пагубу исплатившю, а въ прѡце кнѧзю поточити і; такоже  аже кто двѡръ зажьжеть.

76 [80, 109] А кто пакощами кѡнь порѣжеть іли скотину продажѣ 12 гри(венъ), а пагубу г(о)с(поди)ну оурѡкъ платити.

77 [81, 110] Ты тѧжѣ всѣ судѧть послухи свободнъıми; (111) будеть ли послухъ холѡпъ, то холѡпу на правду не въıлазити, но ѻже хѡщеть истець или иметь и, а река тако: „по сегѡ рѣчи ѥмлю тѧ, но ӕзъ ѥмлю тѧ, а не холѡпъ и ѥмети и на желѣзо; аже ѻбинити  и, то ѥмлеть на немь своѥ, не ѻбинить ли ѥго, платити ѥму грив(на) за муку, зане по  хѡлѡпьи рѣчи ӕлъ и.

78 [82, 112] А желѣзного платити 40 кунъ, а мечнику 5 кунъ, а полгри(внъı) дѣтьскому, то  ти желѣзнъıи  оурѡкъ, кто си в чемь ѥмлеть; (113) аже иметь на желѣзо по свободнъıхъ людии рѣчи, либо ли запа нань  будеть, любо прохожениѥ нощноѥ, или кимь любо ѻбразомь аже не ѻжьжетьс(ѧ), то про муки не платити ѥму, по ѻдинѡ желѣзноѥ кто и будеть ӕлъ.

 

(115) Ѻ женѣ.

 

79 [83] Аже кто оубиѥть жену, то тѣмже судомь судити, ӕкоже и мужа; аже будеть виноватъ, то пѡлвиръı, 20 гри(венъ).

80 [84, 116] А в холѡпѣ  и в робѣ виръı нѣтуть; но ѻже будеть без винъı оубиѥнъ, то за хѡлѡпъ  оурокъ платити, или за робу, а кнѧзю 12 гри(венъ) продажѣ.

(117) Аже оумреть смердъ.

 

81 [85] Аже смердъ оумреть, то задницю кнѧзю; (118) аже будуть дщери оу него дома, то даӕти часть на нѣ; аже буд(у)ть за мужемь, то не даӕти части имъ.

(119) О  задницѣ боӕрьстѣи и  о дружьнѣи.

82 [86] Аже в боӕрехъ любо въдружинѣ, то за кнѧзѧ  задницѧ не идеть, (120) но, ѻже не 6удеть с(ъı)н(о)въ, а дчери возмуть.

83 [87, 121] Аже кто, оумираӕ, раздѣлить дѡмъ свои дѣтемъ, на 1 тѡмже стоӕти; (122) паки ли безъ рѧду оумреть,  то всѣмъ дѣтемъ, а на самого часть дати д(у)ши.

84 [88, 123] Аже жена  сѧдеть по мужи, то на ню часть дати, а что на ню мужь възложить, тому же ѥсть г(о)с(по)жа а, задницѧ ѥи мужнѧ  не надобѣ; (124) буд(у)ть ли дѣти, то что первоѣ  женъı, то то возмуть дѣти м(а)т(е)ре своѥӕ, любо си, на женоу будеть възложилъ, обаче м(а)т(е)ри своѥи возмуть.

85 [89, 125] Аже будеть сестра в домоу, то тѡи задницѣ не імати, но ѿдадѧть ю за мужь братиӕ, како  си мѡгуть.

 

(126) А се закладаюче городъ.

 

86 [90] А се оурѡци городнику: закладаюче горѡдню, куну взѧти, а кѡнчавше нагата: а  за кормъ и  за волѡгу и за мѧса и за ръıбъı 7 кунъ на нед(ѣ)лю, 7 хлѣбовъ, 7 оубѡркѡвъ пшена, 7 луконъ ѡвса на 4 кони, імати же ѥму, донелѣ городъ срубѧть, а солоду ѻдину дадѧть 10 луконъ.

 

(127) Ѻ  мостницѣхъ.

 

87 [91] А се мѡстнику оуроци: помостивше мостъ взѧти ѿ 10 локотъ по ногатѣ; аже починить моста ветхаго, то кѡлико горѡднѣ починить, то взѧти ѥму по кунѣ ѿ горѡднѣ, а мостнику

Самому ѣхати со  ѻтрокомь на  дву коню, 4 лукна ѡвса на нед(ѣ)лю, а ѣсть, что можеть.

 

(128) А се ѻ задницѣ.

 

88 [92] Аже  буд(у)ть рѡбьи  дѣти оу мужа, то задници имъ не имати, но свобода имъ с м(а)т(е)рью.

89 [93, 129] Аже будуть в  дому дѣти мали, а не джи сѧ будуть сами собою печаловати, а м(а)ти имъ пѡидеть за мужь, то кто имъ ближии будеть, тому же дати на  руцѣ і с добъıткомь  и с домомь донелѣже возмѡгуть, а товаръ дати перед людми; а что срѣзить товаромь, тѣмь ли пригостить то то ѥму собѣ, а истъıи товаръ ворѡтить  імъ , а прикупъ ѥму собѣ, зане кормилъ и  печаловалъсѧ ими; ӕже ѿ челѧди плѡд или ѿ скота, то то все пѡімати лицемь; что ли будеть ростерѧлъ, то то все ѥму платити дѣтемъ тѣм(ъ).

90 [94] Аче же и ѿчимъ приіметь дѣти съ эадницею, то такоже ѥсть рѧдъ.

91 (130) А дворъ без дѣла ѡтень всѧкъ меншему с(ъı)н(о)ви.

 

(131) Ѻ  женѣ аже ворчетьс(ѧ) сѣдѣти.

 

92 [95] Аже жена ворчетьс(ѧ) сѣдѣти по мужи, а ростерѧѥть добъıтокъ и пѡидеть за мужь , то платити ѥи все дѣтемъ; (132) не хотѣти ли начнуть дѣти ѥи ни на дворѣ, а ѻна начнеть всѧко хотѣти и сѣдѣти, то творити всѧко вѡлю, а дѣтемъ не дати вѡли; (133) но что ѥи далъ мужь, с тѣм же ѥи сѣдѣти или, свою часть вземше, сѣдѣти же.

93 [96, 134] А м(а)т(е)рнѧ часть ненадобѣ дѣтемъ, но кому м(а)ти дасть, тому же взѧти; дасть ли всѣмъ, а вси роадѣлѧть; (135) безъ ӕзъıка ли оумреть, то оу когѡ будеть на дворѣ бъıла и кто ю кормилъ, то тому взѧти.

94 [97, 136] Аже буд(у)ть двою мужю дѣти, а ѻдиноѣ м(а)т(е)ри, то ѻнѣмъ своѥгѡ ѡ(т)цѧ задницѧ, а ѻнѣмъ своѥго; (137) будеть ли потерѧлъ своѥго инѡчима что, а ѻнѣхъ ѡ(т)цѧ, а оумреть, то възворѡтить брату, на неже и людьѥ въıлѣзуть, что будеть ѻ(те)ць ѥго истерѧлъ инѡчимлѧ, а что ѥму своѥго ѡ(т)цѧ, то держить.

95 [98, 138] А м(а)т(е)ри котѡръıи с(ъı)нъ добръ, перваго ли, другагѡ ли, тому же дасть своѥ; аче и вси с(ъı)н(о)ве ѥи будуть лиси, а дчери мѡжеть дати, кто ю кормить.

 

(139) А се оурѡци судебнии.

 

96 [99] А се оурѡци судебнии; ѿ виръı 9 кунъ, а метелнику 9 вѣкошь, а ѿ бортноѣ земли 30 кунъ, а ѻ инѣхъ  ѻ  всѣхъ тѧжь, кѡму помѡгуть, по 4 кунъı, а метелнику 6 вѣкошь.

 

(140) Ѻ задницѣ.

 

97 [100] Аже братьӕ ростѧжютьс(ѧ) перед  кнѧземь ѻ задницю, котѡръıи дѣтьскии идѣть ихъ дѣлитъ, то тому взѧти гри(вна) коунъ.

 

(141) Оурѡци рѡтнии.

 

98 [101] А се оурѡци рѡтнии: ѿ головъı 30 кунъ, а ѿ бортьноѣ земли 30 кунъ бес трии кунъ; такоже и ѿ ролеиноѣ земли, а ѿ свободъı 9 кунъ.

 

(142) Ѻ холѡпьствѣ.

 

99 [102] Холѡпьство ѻбелноѥ  троѥ: ѻже кто хотѧ  купить до полугри(внъı), а послухи поставить, а ногату дасть перед самѣмъ холѡпомь; [103] а втѡроѥ холѡпьство: пѡіметь робу без рѧду; пѡиметь ли с рѧдомь, то како сѧ будеть рѧдилъ, на том же стоить; [104] а се третьѥѥ холѡпьство: тивуньство без рѧду или привѧжеть ключь к  собѣ без рѧду; с рѧдомь ли, то како сѧ будеть рѧдилъ, на тѡм же стоить.

100 [105, 143] А въ дачь не холѡпъ, ни по хлѣбѣ робѡтѧть, ни по придатъцѣ; но ѻже не дохѡдѧть года, то ворѡчати ѥму м(и)л(о)сть; ѿходить ли, то не виноватъ ѥсть.

101 [106, 144] Аже холѡпъ бѣжить, а заповѣсть г(о)с(поди)нъ, аже слъıшавъ кто, или знаӕ и вѣдаӕ, ѻже ѥсть холѡпъ, а дасть ѥму хлѣба іли оукажеть  ѥму путь, то платити ѥму за холѡпъ 5 гри(венъ), а за робу 6 гри(венъ).

102 [107, 145] Аже кто переиметь чюжь холѡпъ і дасть вѣсть г(о)с(поди)ну ѥгѡ, то имати ѥму переѥмъ гри(вну); не оублюдеть ли, то платити ѥму 4 гри(внъı), а пѧтаӕ переѥмнаӕ ѥму; а будеть роба, то 5 гри(венъ), а шестаӕ на переѥмъ ѿхѡдить.

103 [108, 146] Аже кто своѥгѡ холѡпа самъ досѡчитьсѧ въ чьѥмь любо городѣ, а будетьпосадникъ не вѣдалъ ѥгѡ, то, повѣдавше ѥму, поӕти же ѥму ѻтргѡкъ ѿ негѡ, и шедше оувязати и і дати ѥму вѧзебную 10 кунъ, а переима нѣтуть; (147) аче оупустить и гонѧ, а собѣ ѥму пагуба, а платить в то никтѡже; тѣм же и переима нѣтуть.

104 [109, 148] Аже кто не вѣдаӕ чюжь холѡпъ оусрѧчеть и, или повѣсть дѣѥть, любо держить и оу  собе, а идеть ѿ него, то ити ѥму ротѣ, ӕко не вѣдалъ ѥсмь, ѻже ѥсть холѡпъ, а платежа в тѡмь нѣтуть.

105 [110, 149] Аче же холѡпъ кдѣ кунъı вложить, а ѡнъ будеть не вѣдаӕ вдалъ, то г(о)с(поди)иу въıкупати, али лишитисѧ ѥго; вѣдаӕ ли будеть далъ, а кунъ ѥму лишитисѧ.

106 [111, 150] Аже пустить холѡпъ в торгъ а ѻдолжаѥть то въıкупати ѥгѡ г(о)с(поди)ну и не лишитис(ѧ)ѥгѡ.

107 [112, 151] Аже кто кренеть чюжь холѡпъ не вѣдаӕ, то первому г(о)с(поди)ну холѡпъ понѧти, а ѻному кунъı имати, ротѣ ходивше, ӕко  не  вѣдаӕ ѥсмь купилъ.

108 [113, 152] . . . г(о)с(поди)ну же и, товаръ, а не лишатисѧ ѥго.

109 [114, 153] Аже кто  бѣжа, а пѡиметь сусѣдне что или товаръ, то г(о)с(поди)ну платити зань оурокъ, что будеть взѧлъ.

110 [115, 154] Аже холѡпъ крадеть когѡ любо, то г(о)с(поди)ну въıкупати и любо въıдати  и с кимь будеть кралъ, а женѣ и дѣтемь не надобѣ; но оже будуть с нимь крали  и хоронили, то всѣхъ въıдати; паки  ли а въıкупаѥть г(о)с(поди)нъ; (155) аже будуть свободнии с нимь крали или хоронили, то кнѧзю въ продажѣ.


Нравится? Лайкни!



Категория: Исторические документы / Історичні документи | Добавил: yurist-online (18.12.2014)
Просмотров: 830 | Теги: Киевский князь, Руська правда, Ярослав Мудрый, Троицкий извод
Всего комментариев: 0
avatar